โย ปเนตฺถ จ วตฺตพฺโพ, ปาฬิมุตฺตวินิจฺฉโย;
ตํ มยํ ปรโตเยว, ภณิสฺสาม ปกิณฺณเกฯ
[240]
ปราชิตาเนกมเลน วุตฺตํ;
ปาราชิกํ ยํ ทุติยํ ชิเนน;
วุตฺโต สมาเสน มยสฺส จตฺโถ;
วตฺตุํ อเสเสน หิ โก สมตฺโถฯ
อิติ วินยวินิจฺฉเย ทุติยปาราชิกกถา นิฏฺฐิตาฯ
ตติยปาราชิกกถา
[241]
มนุสฺสชาติํ ชานนฺโต, ชีวิตา โย วิโยชเย;
นิกฺขิเปยฺยสฺส สตฺถํ วา, วเทยฺย มรเณ คุณํฯ
[242]
เทเสยฺย มรณูปายํ, โหตายมฺปิ ปราชิโต;
อสนฺเธยฺโยว โส เญยฺโย, ทฺเวธา ภินฺนสิลา วิยฯ
[243]
วุตฺตา ปาณาติปาตสฺส, ปโยคา ฉ มเหสินา;
สาหตฺถิโก ตถาณตฺติ-นิสฺสคฺคิถาวราทโยฯ
[244]
ตตฺถ กาเยน วา กาย-ปฏิพทฺเธน วา สยํ;
มาเรนฺตสฺส ปรํ ฆาโต, อยํ สาหตฺถิโก มโตฯ
[245]
‘‘เอวํ ตฺวํ ปหริตฺวา ตํ, มาเรหี’’ติ จ ภิกฺขุโน;
ปรสฺสาณาปนํ นาม, อยมาณตฺติโก นโยฯ
[246]
ทูรํ มาเรตุกามสฺส, อุสุอาทินิปาตนํ;
กาเยน ปฏิพทฺเธน, อยํ นิสฺสคฺคิโย วิธิฯ
[247]
อสญฺจาริมุปาเยน, มารณตฺถํ ปรสฺส จ;
โอปาตาทิวิธานํ ตุ, ปโยโค ถาวโร อยํฯ
[248]